గాంధారి అటవీ ప్రాంతంలో అక్రమ జూద స్థావరంపై పోలీసుల దాడి
ఐదుగురు అరెస్ట్, రూ.48,100 నగదు స్వాధీనం
తెలంగాణ డైలీ న్యూస్, కామారెడ్డి: గాంధారి పోలీస్ స్టేషన్ పరిధిలోని పోతంగల్ గ్రామ అటవీ ప్రాంతంలో రహస్యంగా నిర్వహిస్తున్న జూద స్థావరంపై పోలీసులు మెరుపు దాడి చేశారు.
ఐదుగురు పట్టివేత, నగదు స్వాధీనం
విశ్వసనీయ సమాచారం మేరకు గాంధారి ఎస్ఐ మహిందర్ ఆధ్వర్యంలో పోలీసు సిబ్బంది దాడి నిర్వహించారు. పేకాట ఆడుతున్న ఐదుగురు వ్యక్తులను అదుపులోకి తీసుకున్నారు. వారి వద్ద నుంచి రూ.48,100 నగదు, 4 మొబైల్ ఫోన్లు, 4 ద్విచక్ర వాహనాలను స్వాధీనం చేసుకున్నారు. నిందితులపై చట్టపరమైన కేసు నమోదు చేసినట్లు పోలీసులు తెలిపారు.
జూదం కుటుంబాలను కూల్చే మహమ్మారి: ఎస్పీ
ఈ సందర్భంగా జిల్లా ఎస్పీ ఎం.రాజేష్ చంద్ర మాట్లాడుతూ జూదం కేవలం వ్యసనం కాదని, కుటుంబాల ఆర్థిక పరిస్థితులను దెబ్బతీసే ప్రమాదకరమైన రుగ్మత అని అన్నారు. సులభంగా డబ్బు సంపాదించాలనే అత్యాశతో జూదం వైపు వెళ్లే వారు చివరకు అప్పుల ఊబిలోకి, కుటుంబ కలహాల్లోకి, మానసిక ఒత్తిడిలోకి వెళతారని హెచ్చరించారు. యువత చట్టవిరుద్ధ కార్యకలాపాలకు దూరంగా ఉండి బాధ్యతాయుతమైన పౌరులుగా భవిష్యత్తును నిర్మించుకోవాలని సూచించారు.
రహస్య ప్రదేశాల్లో జూదంపై ఉపేక్షించం
జిల్లా వ్యాప్తంగా ఫామ్ హౌస్లు, తోటలు, నిర్మానుష్య ప్రాంతాలు లేదా రహస్య ప్రదేశాల్లో అక్రమంగా జూదం, పేకాట స్థావరాలు నిర్వహించినా ఉపేక్షించబోమని ఎస్పీ స్పష్టం చేశారు. చట్టాన్ని ఉల్లంఘించే వారిపై కఠిన చర్యలు తప్పవని హెచ్చరించారు.
సమాచారం ఇవ్వండి, వివరాలు గోప్యం
జిల్లాను నేరరహిత, ప్రశాంత ప్రాంతంగా ఉంచేందుకు పోలీసులు నిరంతరం నిఘా కొనసాగిస్తున్నారని తెలిపారు. ఎక్కడైనా జూదం లేదా ఇతర చట్టవ్యతిరేక కార్యకలాపాలు జరుగుతున్నట్లు గమనిస్తే వెంటనే స్థానిక పోలీస్ స్టేషన్కు లేదా డయల్ 100కు సమాచారం అందించాలని ప్రజలను కోరారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని ఎస్పీ తెలిపారు.
إرسال تعليق