బాధిత మహిళలు, చిన్నారులకు భరోసా కేంద్రమే అండ
సేవలను సమీక్షించిన కలెక్టర్ అశిష్ సంగ్వాన్, ఎస్పీ రాజేష్ చంద్ర
తెలంగాణ డైలీ న్యూస్, కామారెడ్డి: మహిళలు, చిన్నారులపై జరిగే నేరాల బాధితులకు న్యాయం, రక్షణ, పునరావాసం ఒకే చోట అందించే జిల్లా భరోసా కేంద్రం కీలకంగా పనిచేస్తోందని జిల్లా కలెక్టర్ అశిష్ సంగ్వాన్, జిల్లా ఎస్పీ యం. రాజేష్ చంద్ర అన్నారు.
భరోసా కేంద్రంలో సంయుక్త సమీక్ష
బుధవారం కలెక్టర్, ఎస్పీ సంయుక్తంగా కామారెడ్డి జిల్లా భరోసా కేంద్రాన్ని సందర్శించారు. కేంద్రంలో బాధితులకు అందుతున్న సేవలు, నమోదైన కేసుల పురోగతి, వివిధ శాఖల సమన్వయం, కౌన్సెలింగ్, న్యాయ, వైద్య సహాయంపై భరోసా కోఆర్డినేటర్ కవితతో కలిసి సమగ్రంగా సమీక్షించారు.
ఒకే వేదికపై సత్వర సేవలు అందాలి - కలెక్టర్
ఈ సందర్భంగా కలెక్టర్ అశిష్ సంగ్వాన్ మాట్లాడుతూ, "భరోసా కేంద్రానికి వచ్చే ప్రతి బాధితురాలికి ఒకే వేదికపై వేగంగా, నాణ్యమైన సేవలు అందాలి. వైద్య, న్యాయ, పోలీసు, మహిళా శిశు సంక్షేమ శాఖలు సమన్వయంతో పనిచేసి బాధితులకు సత్వర న్యాయం జరిగేలా చూడాలి" అని అధికారులను ఆదేశించారు.
సానుభూతితో వ్యవహరించాలి - ఎస్పీ
జిల్లా ఎస్పీ రాజేష్ చంద్ర మాట్లాడుతూ, భరోసా కేంద్రానికి వచ్చే ప్రతి బాధితురాలితో సిబ్బంది సానుభూతితో, మానవీయ దృక్పథంతో వ్యవహరించాలని సూచించారు.
"వైద్య సేవలు, మానసిక కౌన్సెలింగ్, ఉచిత న్యాయ సహాయం, పోలీసు సహాయం, పునరావాసం ఎలాంటి ఆలస్యం లేకుండా అందించాలి. మహిళలు, చిన్నారులపై నేరాల కేసుల దర్యాప్తును వేగవంతంగా పూర్తి చేయాలి. ప్రతి కేసులో బాధితుల వివరాల గోప్యతను కచ్చితంగా పరిరక్షించాలి. బాధితుల్లో విశ్వాసం పెరిగేలా సేవలు మరింత మెరుగుపడాలి" అని ఆయన స్పష్టం చేశారు. అనంతరం కలెక్టర్, ఎస్పీ భరోసా కేంద్రంలోని కౌన్సెలింగ్ గదులు, లీగల్ సెల్, మెడికల్ ఎయిడ్ విభాగం, రికార్డుల నిర్వహణను పరిశీలించారు. సేవల నాణ్యతను మరింత పెంచేందుకు పలు సూచనలు చేశారు.
ఈ కార్యక్రమంలో భరోసా కేంద్రం కోఆర్డినేటర్ శ్రీమతి కవిత, కేంద్ర సిబ్బంది పాల్గొన్నారు.
إرسال تعليق