ప్రజావాణి ఇప్పుడు ఆర్డీవో కార్యాలయాల్లోనే!
తగ్గిన దూర భారం, సమయం
ప్రజలు సద్వినియోగం చేసుకోండి
తెలంగాణ డైలీ న్యూస్, కామారెడ్డి:
ప్రభుత్వం ప్రజావాణి కార్యక్రమాన్ని ఆర్డీవో కార్యాలయాలకు విస్తరించింది. ఇప్పటివరకు మండల, జిల్లా, రాష్ట్ర స్థాయిలో కొనసాగుతున్న ఈ కార్యక్రమం 15 రోజుల క్రితం నుంచి కామారెడ్డి, ఎల్లారెడ్డి, బాన్సువాడ ఆర్డీవో కార్యాలయాల్లో కూడా అందుబాటులోకి వచ్చింది. అయితే ప్రజలకు తగిన అవగాహన లేకపోవడంతో దరఖాస్తులు తక్కువగా వస్తున్నాయి. ఈ మూడు ఆర్డీవో కార్యాలయాల్లో కలిపి ఇప్పటివరకు సుమారు 20 అర్జీలు మాత్రమే వచ్చాయి. అదే జిల్లా కలెక్టరేట్లో జరిగే ప్రజావాణికి ప్రతిసారీ 100కు పైగా అర్జీలు వస్తున్నాయి.
ఎక్కడి వారు అక్కడే అందిస్తే ప్రయోజనం
కామారెడ్డి జిల్లాలో మూడు రెవెన్యూ డివిజన్లు ఉన్నాయి. ప్రతి డివిజన్ పరిధిలోని ప్రజలు తమ సమీప ఆర్డీవో కార్యాలయంలోనే అర్జీలు ఇవ్వాలని ప్రభుత్వం సూచిస్తోంది. ప్రజావాణిలో వచ్చిన అర్జీలను నెల రోజుల్లో పరిష్కరించాలని ముఖ్యమంత్రి ఇటీవల అధికారులను ఆదేశించారు. ఆర్డీవో స్థాయి ప్రజావాణికి కూడా ప్రాధాన్యత ఇవ్వాలని చెప్పారు. ప్రస్తుతం ఆర్డీవో కార్యాలయాల్లో జరుగుతున్న ప్రజావాణికి డివిజన్ స్థాయి అధికారులు హాజరవుతున్నారు.
జుక్కల్, పిట్లం, మద్నూర్, బిచ్కుంద, నిజాంసాగర్, డోంగ్లి, నస్రుల్లాబాద్ మండలాల ప్రజలు కామారెడ్డి కలెక్టరేట్కు రావాలంటే తెల్లవారుజామున 5 లేదా 6 గంటలకు బయలుదేరాలి. 11 గంటలకు గానీ చేరుకోలేరు. ఒక్కొక్కరికి 500-600 రూపాయల వరకు ఖర్చవుతుంది. అదే ఈ ప్రజలు బాన్సువాడ ఆర్డీవో కార్యాలయంలోని ప్రజావాణికి వెళ్తే డబ్బుతో పాటు సమయం కూడా ఆదా అవుతుంది. అలాగే ఎల్లారెడ్డి నియోజకవర్గంలోని లింగంపేట్, గాంధారి, నాగిరెడ్డి పేట మండలాల ప్రజలు ఎల్లారెడ్డి ఆర్డీవో కార్యాలయాన్ని వినియోగించుకుంటే మేలు. ఆర్డీవో స్థాయిలో పరిష్కారం కాని సమస్యలకు మాత్రమే కలెక్టరేట్ ప్రజావాణికి వెళ్లాలి.
అన్నింటికీ కలెక్టరేట్కే వెళ్తున్న వైనం
జిల్లాలో ఏ చిన్న సమస్య వచ్చినా ప్రజలు నేరుగా కలెక్టరేట్ ప్రజావాణికే వస్తున్నారు. కొందరు మూడేళ్లు, నాలుగేళ్లుగా కలెక్టరేట్ చుట్టూ తిరుగుతూనే ఉన్నారు. గతంలో నిజామాబాద్ కలెక్టరేట్కు వెళ్లిన వారు ఇప్పుడు కామారెడ్డి కలెక్టరేట్కు వస్తున్నారు. 11 ఏళ్లుగా కార్యాలయాల చుట్టూ తిరిగినా పరిష్కారం దొరకని కేసులు కూడా ఉన్నాయి. ఇలాంటి వాటిపై అధికారులు ప్రత్యేక దృష్టి పెట్టాలి.
మండల స్థాయిలో పరిష్కారమయ్యే సమస్యలకు కూడా కొందరు కలెక్టరేట్కు వచ్చి అర్జీలు ఇస్తున్నారు. ఒకవేళ సమస్య పరిష్కరించలేని పక్షంలో అందుకు గల కారణాలను అధికారులు ప్రజలకు స్పష్టంగా వివరిస్తే వారు మళ్లీమళ్లీ కార్యాలయాలకు రారు. ప్రజల దూరభారాన్ని తగ్గించడానికే ప్రభుత్వం ఆర్డీవో కార్యాలయాల్లో ప్రజావాణిని ప్రారంభించింది.
గుర్తుంచుకోవాల్సిన అంశాలు:
1. ప్రజావాణి ఇప్పుడు మీ డివిజన్ ఆర్డీవో కార్యాలయంలో కూడా ఉంది.
2. జుక్కల్, పిట్లం ప్రాంతాల వారు బాన్సువాడ ఆర్డీవోకు, లింగంపేట, గాంధారి, నాగిరెడ్డి పేట, ఎల్లారెడ్డి ప్రాంతాల వారు ఎల్లారెడ్డి ఆర్డీవోకు వెళ్తే సమయం, ఖర్చు కలిసి వస్తుంది.
3. ఆర్డీవో స్థాయిలో పరిష్కారం కాని అంశాలకే కలెక్టరేట్కు వెళ్లండి.
4. అర్జీ ఇచ్చిన నెల రోజుల్లో సమస్య పరిష్కరించేలా సీఎం ఆదేశాలు ఉన్నాయి.
5. అవగాహనతో ప్రజావాణిని సద్వినియోగం చేసుకోండి.
إرسال تعليق