అధికారులకు ఫిర్యాదు చేసినా ఫలితం లేదని ప్రతిపక్ష కౌన్సిలర్ల ఆరోపణ
బాన్సువాడలో ప్రతిపక్ష పార్టీల భేటీ
తెలంగాణ డైలీ న్యూస్, బాన్సువాడ : అభివృద్ధి పేరుతో ఎల్లయ్య చెరువు మట్టిని అధికార పార్టీ నేతలు అమ్ముకుంటున్నారని ప్రతి పక్ష పార్టీల నాయకులు ఆరోపించారు. కామారెడ్డి జిల్లా బాన్సువాడ ప్రభుత్వ అతిథి గృహంలో ఎల్లయ్య చెరువుపై ప్రతి పక్ష పార్టీల సమావేశం జరిగింది.
ప్రతిపక్ష కౌన్సిలర్ల అధ్యక్షతన సమావేశం
ఈ సమావేశానికి బాన్సువాడ మున్సిపల్కు చెందిన ఏడుగురు ప్రతిపక్ష కౌన్సిలర్లు అధ్యక్షత వహించారు. బీఆర్ఎస్, బీజేపీ, టి ఆరెస్, టీడీపీ నాయకులు పాల్గొన్నారు.
‘ఇదేనా అభివృద్ధి’ అని నిలదీత
సుందరీకరణ పేరుతో చెరువులోని మట్టిని రైతులకు కాకుండా ఇటుక బట్టీలకు, వెంచర్ వాళ్లకు, చెరువు పక్కన ఉన్న ప్లాట్లకు వందల కొద్దీ టిప్పర్లలో అమ్ముకుంటున్నారని నాయకులు ఆరోపించారు. “ఇదేనా మీ అభివృద్ధి?” అని అధికార పార్టీ నేతలను నిలదీశారు.
అధికారులకు ఫిర్యాదు చేసినా చర్యలు శూన్యం
ఈ అంశంపై ఆర్డీవోకు, ఇరిగేషన్ అధికారులకు వినతిపత్రం ఇచ్చినా పట్టించుకోలేదని ప్రతిపక్ష కౌన్సిలర్లు తెలిపారు. నిన్న కలెక్టర్కు వినతిపత్రం అందజేసినప్పటికీ అధికార పార్టీ నాయకుల టిప్పర్లు యథేచ్ఛగా మట్టిని తరలిస్తున్నారని ఆవేదన వ్యక్తం చేశారు. “కౌన్సిలర్ అంటే లెక్క లేదా?” అని ప్రశ్నించారు.
ఆందోళనకు హెచ్చరిక
కలెక్టర్, ఆర్డీవోలు వెంటనే మట్టి తరలింపును ఆపకపోతే పెద్ద ఎత్తున ఆందోళన చేస్తామని ప్రతి పక్ష నేతలు హెచ్చరించారు. “నిజంగా అభివృద్ధి కావాలంటే రైతుల పొలాల్లో మట్టి పంపండి” అని డిమాండ్ చేశారు.
ఈ కార్యక్రమంలో బీఆర్ఎస్ నాయకులు అంజిరెడ్డి, నార్ల రత్నకుమార్, బాడీ శ్రీను, అతిఫ్ అజీమ్, టి ఆరెస్ నేత మామిళ్ల రాజు, బీజేపీ నాయకులు శంకర్ గౌడ్, తుప్తి ప్రసాద్, అనిల్, టీడీపీ నాయకులు శంషుద్దీన్, ఏడుగురు ప్రతిపక్ష కౌన్సిలర్లు ఖలీల్, ఫెరోజ్ తదితరులు పాల్గొన్నారు.
إرسال تعليق