బాన్సువాడలో MLC పింగళి శ్రీపాల్ రెడ్డితో "చాయ్ పే చర్చ"
ఈ నెలలో హెల్త్ కార్డులు, పెండింగ్ బకాయిలు ఆగస్టుకు విడుదల: ఎమ్మెల్సీ హామీ
తెలంగాణ డైలీ న్యూస్, బాన్సువాడ, జూన్ 13: ఉపాధ్యాయుల సమస్యల పరిష్కారం కోసం PRTU సంఘం నిరంతరం ప్రభుత్వంపై ఒత్తిడి తెస్తోందని PRTU ఎమ్మెల్సీ పింగళి శ్రీపాల్ రెడ్డి అన్నారు. శుక్రవారం బోధన్ నుండి హైదరాబాద్కు వెళ్తూ బాన్సువాడలోని సాయిలు హోటల్ వద్ద ఏర్పాటు చేసిన "చాయ్ పే చర్చ" కార్యక్రమంలో ఆయన పాల్గొన్నారు. ఈ సందర్భంగా సుమారు 60 మంది ఉపాధ్యాయులతో సమావేశమై వారి సమస్యలు, అభిప్రాయాలు, సూచనలను తెలుసుకున్నారు.
హెల్త్ కార్డులపై కీలక ప్రకటన
ఉపాధ్యాయులను ఉద్దేశించి మాట్లాడుతూ, ఎన్నో ఏళ్లుగా ఎదురుచూస్తున్న హెల్త్ కార్డుల వ్యవస్థ ఈ నెలలో పూర్తిస్థాయిలో అమలులోకి వచ్చే అవకాశాలు ఉన్నాయని తెలిపారు. అలాగే విశ్రాంత ఉపాధ్యాయులకు చెల్లించాల్సిన పెండింగ్ బకాయిలను ఆగస్టు నెల నాటికి విడుదల చేసే దిశగా ప్రభుత్వం చర్యలు చేపడుతోందన్నారు.
పని వేళలు, పాత పెన్షన్పై స్పందన
పాఠశాల పని వేళల మార్పు అంశంపై కూడా ప్రభుత్వం సానుకూలంగా స్పందిస్తోందని, త్వరలోనే ఉపాధ్యాయులకు అనుకూలమైన నిర్ణయం వెలువడే అవకాశం ఉందని పేర్కొన్నారు. DSC-2003 ద్వారా నియమితులైన ఉపాధ్యాయులకు పాత పెన్షన్ విధానం అమలు చేయాలని PRTU తరఫున బలంగా డిమాండ్ చేస్తున్నామని, ఈ అంశంపై ప్రభుత్వం దృష్టి సారించేలా నిరంతర కృషి కొనసాగిస్తున్నామని వివరించారు.
సంక్షేమమే ప్రధాన లక్ష్యం
అనంతరం ఉపాధ్యాయులు ఎదుర్కొంటున్న పలు సమస్యలపై సుదీర్ఘంగా చర్చించి, వాటి పరిష్కారానికి సంఘం చేపడుతున్న చర్యలను వివరించారు. ఉపాధ్యాయుల సంక్షేమం, హక్కుల పరిరక్షణే తమ ప్రధాన లక్ష్యమని ఆయన స్పష్టం చేశారు.
ఈ కార్యక్రమంలో కామారెడ్డి జిల్లా అధ్యక్షులు కుశాల్ గారితో పాటు వివిధ మండలాల అధ్యక్షులు, ప్రధాన కార్యదర్శులు, రాష్ట్ర, జిల్లా, మండల స్థాయి బాధ్యులు మరియు పెద్ద సంఖ్యలో ఉపాధ్యాయులు పాల్గొన్నారు.
إرسال تعليق