Bike Accident | మైనర్ బాలుడి బైక్ స్టంట్‌కు అమాయకుడి బలి...!

ఆరోసారి డ్రంక్ అండ్ డ్రైవ్.. 12 రోజుల జైలు శిక్ష 

చట్టాన్ని లెక్కచేయని మందుబాబుకు కోర్టు గట్టి షాక్

మద్యం మత్తులో స్టీరింగ్ పడితే జైలు ఖాయం: ఎస్పీ రాజేష్ చంద్ర

తెలంగాణ డైలీ న్యూస్, కామారెడ్డి, జూన్ 20: "ఒక్కసారి తాగి డ్రైవ్ చేస్తే ఫైన్ కట్టి బయటపడొచ్చు" అని నిర్లక్ష్యంగా భావించే వారికి కామారెడ్డి పోలీసులు గట్టి హెచ్చరిక పంపారు. మద్యం మత్తులో వాహనం నడుపుతూ వరుసగా ఆరోసారి పోలీసులకు చిక్కిన నిందితుడికి గౌరవ న్యాయస్థానం ఏకంగా 12 రోజుల సాధారణ జైలు శిక్ష విధించింది.

ఘటన వివరాలు 

సదాశివనగర్ పోలీస్ స్టేషన్ పరిధిలో పోలీసులు నిర్వహించిన డ్రంక్ అండ్ డ్రైవ్ తనిఖీలలో ఒక వ్యక్తి మద్యం సేవించి వాహనం నడుపుతూ పట్టుబడ్డాడు. అయితే పోలీసులు నిందితుడి వాహన వివరాలను ఆన్‌లైన్ డేటాబేస్‌లో పరిశీలించగా షాకింగ్ నిజం బయటపడింది.

అదే నిందితుడు గతంలో ఐదు సార్లు డ్రంక్ అండ్ డ్రైవ్ కేసుల్లో పట్టుబడినట్లు పోలీస్ డిజిటల్ రికార్డులు వెల్లడించాయి. గతంలో ఎన్నిసార్లు జరిమానాలు విధించినా, కౌన్సిలింగ్ చేసినా, కఠినంగా హెచ్చరించినా అతని ప్రవర్తనలో మార్పు రాలేదు. దీంతో పోలీసులు ఈ కేసును ప్రతిష్టాత్మకంగా తీసుకొని, గత పూర్తి వివరాలను కోర్టులో సమర్పించారు.

నిందితుడి పాత రికార్డులు, సమాజ భద్రతను దృష్టిలో ఉంచుకొని న్యాయస్థానం మొత్తం 12 రోజుల జైలు శిక్ష విధిస్తూ తీర్పు చెప్పింది. కోర్టు ఆదేశాలతో పోలీసులు వెంటనే నిందితుడిని రిమాండ్‌కు తరలించారు.

ఎస్పీ హెచ్చరిక 

జిల్లా ఎస్పీ ఎం. రాజేష్ చంద్ర మాట్లాడుతూ, "మద్యం మత్తులో వాహనం నడపడం సాధారణ చట్ట ఉల్లంఘన కాదు, నడిరోడ్డుపై ప్రాణాలతో చెలగాటమాడటమే. మద్యం సేవించి స్టీరింగ్ పడితే డ్రైవర్‌తో పాటు తోటి ప్రయాణికులు, అమాయక రోడ్డు వినియోగదారుల ప్రాణాలు ప్రమాదంలో పడతాయి. మద్యం మత్తు కొన్ని గంటలే.. కానీ దాని పరిణామాలు జీవితాంతం వెంటాడవచ్చు" అని స్పష్టం చేశారు.

డ్రంక్ అండ్ డ్రైవ్‌ను అలవాటుగా మార్చుకుంటే ఇదే పరిణామం తప్పదని, చట్టాన్ని ఉల్లంఘిస్తే జైలు ఖాయమని ఎస్పీ హెచ్చరించారు. మద్యం సేవించిన తర్వాత ఎట్టి పరిస్థితుల్లోనూ వాహనాలు నడపవద్దని కోరారు.

*డ్రంక్ అండ్ డ్రైవ్‌పై ఉక్కుపాదం: 374 మందికి కోర్టు శిక్షలు*  

_₹4.06 లక్షల జరిమానా, 20 మందికి జైలు శిక్షలు విధించిన న్యాయస్థానం_  

_నిబంధనలు ఉల్లంఘిస్తే కఠిన చర్యలు తప్పవు: ఎస్పీ రాజేష్ చంద్ర_

కామారెడ్డి, జూన్ 20: మద్యం మత్తులో వాహనాలు నడిపిన వారిపై కామారెడ్డి పోలీసులు ఉక్కుపాదం మోపారు. జిల్లా వ్యాప్తంగా నిర్వహించిన ప్రత్యేక డ్రంక్ అండ్ డ్రైవ్ తనిఖీల్లో పట్టుబడిన 374 మందికి న్యాయస్థానం వివిధ శిక్షలు విధించింది.

*కోర్టు విధించిన శిక్షలు*  

పట్టుబడిన వారిని కోర్టులో హాజరుపరచగా, మొత్తం ₹4,06,400 జరిమానా విధించారు. ఇందులో 15 మందికి ఒక రోజు జైలు శిక్ష, 3 మందికి రెండు రోజుల జైలు శిక్ష, ఒకరికి నాలుగు రోజుల జైలు శిక్ష, మరొకరికి ఐదు రోజుల జైలు శిక్ష విధించారు. మొత్తం 20 మందికి జైలు శిక్ష పడింది.

*ఎస్పీ హెచ్చరిక*  

ఈ సందర్భంగా జిల్లా ఎస్పీ ఎం. రాజేష్ చంద్ర, ఐపీఎస్ మాట్లాడుతూ, “మద్యం మత్తులో వాహనం నడపడం వల్ల ప్రమాదాలు జరిగి అమాయకుల ప్రాణాలు కోల్పోయే అవకాశం ఉంది. డ్రంక్ అండ్ డ్రైవ్‌కు పాల్పడే వారిపై చట్టప్రకారం కఠిన చర్యలు తీసుకుంటున్నాం” అని స్పష్టం చేశారు.

మద్యం సేవించిన అనంతరం వాహనాలు నడపకుండా ప్రజలు ప్రత్యామ్నాయ రవాణా సదుపాయాలను వినియోగించాలని, రోడ్డు భద్రత ప్రతి ఒక్కరి బాధ్యత అని ఎస్పీ పేర్కొన్నారు.

జిల్లా వ్యాప్తంగా డ్రంక్ అండ్ డ్రైవ్ తనిఖీలు నిరంతరం కొనసాగుతాయని, నిబంధనలు ఉల్లంఘించే వారిపై కఠిన చట్టపరమైన చర్యలు తప్పవని జిల్లా పోలీసులు హెచ్చరించారు.