బాన్సువాడ: బాన్సువాడ పట్టణంలోని మున్సిపల్ 4వ వార్డు ఇస్లాంపురా కాలనీలో నిరుపేద జరీనా కుటుంబం నివసిస్తున్న ఇల్లు అకస్మాత్తుగా కూలిపోయిన ఘటన సోమవారం కలకలం రేపింది. ఈ ఘటనలో ఎలాంటి ప్రాణనష్టం జరగలేదు. అయితే ఇంట్లోని సామగ్రి పూర్తిగా ధ్వంసం కావడంతో ఆ కుటుంబం తీవ్ర ఆర్థిక ఇబ్బందుల్లో చిక్కుకుంది. ప్రస్తుతం తలదాచుకునే నివాసం లేక వారు రోడ్డున పడ్డారు.
ఘటనా స్థలాన్ని సందర్శించిన బీఆర్ఎస్ నాయకులు
ఈ విషయం తెలుసుకున్న బీఆర్ఎస్ పార్టీ నియోజకవర్గ నాయకులు, మాజీ మున్సిపల్ వైస్ చైర్మన్ షేక్ జుబేర్ బాధిత కుటుంబాన్ని పరామర్శించారు. ఈ సందర్భంగా ఆయన తన స్వంత నిధుల నుండి ఆర్థిక సహాయాన్ని అందించారు. అలాగే కుటుంబానికి 25 కిలోల బియ్యాన్ని అందజేసి భరోసా ఇచ్చారు.
బాధితుల ఇబ్బందులను తెలుసుకున్న షేక్ జుబేర్ వెంటనే సంబంధిత ఆర్డీఓతో ఫోన్ ద్వారా మాట్లాడారు. తాడ్కోల్లోని డబుల్ బెడ్రూమ్ గృహాల్లో బాధిత కుటుంబాన్ని తాత్కాలికంగా ఆశ్రయం కల్పించాలని, వారికి అవసరమైన అన్ని ప్రభుత్వ సహాయాలను అందించాలని కోరారు.
ప్రభుత్వానికి వినతి
ఈ సందర్భంగా షేక్ జుబేర్ మాట్లాడుతూ, బాధిత కుటుంబానికి ప్రభుత్వం వెంటనే ఆర్థిక సహాయం అందించాలని డిమాండ్ చేశారు. అదేవిధంగా వారికి శాశ్వత గృహాన్ని మంజూరు చేయాలని, అన్ని విధాలుగా ఆదుకోవాలని ప్రభుత్వాన్ని విజ్ఞప్తి చేశారు.
ఈ కార్యక్రమంలో మున్సిపల్ కౌన్సిలర్లు ఫెరోజ్ ఖాన్, మాక్బూల్, మాజీ కౌన్సిలర్ బాడీ శ్రీనివాస్, మాజీ వార్డు సభ్యుడు అక్బర్, బీఆర్ఎస్ మైనారిటీ సెల్ నాయకుడు ఇసాక్, పార్టీ నాయకులు రమేష్ యాదవ్, మొహమ్మద్ షఫీ, ఖాదర్, ఉస్మాన్, గంగారాం, ఖాలేద్, అఫ్జల్ తదితరులు పాల్గొన్నారు.ప్రభుత్వం వెంటనే స్పందించి బాధిత కుటుంబానికి న్యాయం చేయాలని స్థానికులు కోరుతున్నారు.
Post a Comment