వివిధ రంగాల్లో రాణించిన మైనారిటీ విద్యార్థులకు సీఎం రేవంత్ రెడ్డి చేతుల మీదుగా అవార్డుల ప్రదానం
హైదరాబాద్ : తెలంగాణ రాష్ట్ర మైనారిటీ సంక్షేమ శాఖ ఆధ్వర్యంలో "తెలంగాణ మైనారిటీ ఎక్సలెన్స్ సమ్మిట్" ఘనంగా నిర్వహించబడింది. ఈ కార్యక్రమానికి ముఖ్య అతిథిగా ముఖ్యమంత్రి ఎ. రేవంత్ రెడ్డి హాజరై వివిధ రంగాల్లో ప్రతిభ కనబరిచిన మైనారిటీ విద్యార్థులు, వ్యక్తులను సన్మానించారు. (వీడియో 👇)
ప్రతిభావంతులకు అవార్డులుసమ్మిట్ లో భాగంగా చదువు, క్రీడలు, ఇతర రంగాల్లో అసాధారణ ప్రతిభ చూపిన మైనారిటీ విద్యార్థులకు సీఎం రేవంత్ రెడ్డి, మంత్రులు మరియు ఇతర ప్రజా ప్రతినిధులు అవార్డులు, ప్రశంసా పత్రాలను అందజేశారు. కార్యక్రమంలో విద్యార్థులను శాలువాలతో సత్కరించి అభినందించారు.
మైనారిటీ సంక్షేమ శాఖ మంత్రి అజరుద్దీన్, రాష్ట్ర ప్రభుత్వ సలహాదారులు మహ్మద్ అలీ షబ్బీర్, మంత్రి పొంగులేటి, ఇతర నాయకులు కూడా ఈ వేడుకలో పాల్గొన్నారు. వేదికపై మైనారిటీ విద్యార్థుల ప్రతిభను ప్రభుత్వం గుర్తిస్తుందని, వారి ఉన్నతికి అవసరమైన అన్ని సహాయ సహకారాలు అందిస్తామని సీఎం ప్రకటించారు.
మైనారిటీల అభివృద్ధే ప్రభుత్వ లక్ష్యం
ఈ సందర్భంగా సీఎం రేవంత్ రెడ్డి మాట్లాడుతూ రాష్ట్రంలో మైనారిటీల సంక్షేమం, విద్య, ఉపాధి అవకాశాల కోసం ప్రభుత్వం ప్రత్యేక చర్యలు తీసుకుంటుందని తెలిపారు. వివిధ రంగాల్లో మైనారిటీ యువత రాణించేలా ప్రభుత్వం అన్ని విధాలుగా ప్రోత్సహిస్తుందని చెప్పారు.
కార్యక్రమానికి పెద్ద సంఖ్యలో మైనారిటీ విద్యార్థులు, పెద్దలు, ప్రజా ప్రతినిధులు, అధికారులు హాజరయ్యారు. కార్యక్రమం అనంతరం అతిథులకు పూలబొకేలు అందజేసి స్వాగతం పలికారు.
"Honouring Minority Excellence in Various Fields" అనే నినాదంతో జరిగిన ఈ సమ్మిట్ మైనారిటీ యువతలో స్ఫూర్తిని నింపిందని పాల్గొన్న వారు అభిప్రాయపడ్డారు.
రాష్ట్ర స్థాయి ఇంటర్లో ప్రతిభ చాటిన కామారెడ్డి విద్యార్థులకు ఘన సన్మానం
కామారెడ్డి పట్టణంలోని సాందీపని కళాశాల విద్యార్థులు ఇంటర్మీడియట్ బైపీసీ విభాగంలో రాష్ట్ర స్థాయిలో అత్యుత్తమ ప్రతిభ కనబరిచి కామారెడ్డి జిల్లాకు గర్వకారణంగా నిలిచారు.
ఈ సందర్భంగా ప్రతిభావంతులైన విద్యార్థులను తెలంగాణ రాష్ట్ర ముఖ్యమంత్రి అనుముల రేవంత్ రెడ్డి, ప్రభుత్వ సలహాదారు మహమ్మద్ అలీ షబ్బీర్ గార్ల చేతుల మీదుగా హైదరాబాదులోని బంజారా కొమరం భీం భవన్లో ఘనంగా సన్మానించారు.
ఇంటర్మీడియట్ బైపీసీ ప్రథమ సంవత్సరంలో సాందీపని కళాశాలకు చెందిన ఐమాన్ మసీర 440 మార్కులకు గాను 439 మార్కులు సాధించి రాష్ట్రంలో ప్రథమ ర్యాంకు సాధించారు. అత్యుత్తమ మార్కులతో రాష్ట్ర స్థాయిలో మొదటి స్థానాన్ని కైవసం చేసుకోవడం పట్ల ఆమెను ముఖ్యమంత్రి రేవంత్ రెడ్డి, ప్రభుత్వ సలహాదారు మహమ్మద్ అలీ షబ్బీర్ అభినందించారు.
అదేవిధంగా ఇంటర్మీడియట్ బైపీసీ ద్వితీయ సంవత్సరంలో ఆస్మా జబీన్ రాష్ట్ర స్థాయిలో రెండవ ర్యాంకు సాధించి విశేష ప్రతిభను కనబరిచారు. ఇద్దరు విద్యార్థుల ప్రతిభను గుర్తించిన ప్రభుత్వం వారిని ఘనంగా సత్కరించి, ప్రోత్సాహకంగా ల్యాప్టాప్లను అందజేసింది.
ఈ సందర్భంగా విద్యార్థులను అభినందించిన ముఖ్యమంత్రి రేవంత్ రెడ్డి, ప్రభుత్వ సలహాదారు మహమ్మద్ అలీ షబ్బీర్ మాట్లాడుతూ..
విద్యార్థులు కష్టపడి చదివి రాష్ట్ర స్థాయిలో అత్యుత్తమ ర్యాంకులు సాధించడం అభినందనీయమని అన్నారు. విద్యార్థుల ప్రతిభను ప్రోత్సహించడం ద్వారా భవిష్యత్తులో మరింత మంది విద్యార్థులు ఉన్నత లక్ష్యాలను సాధించేలా ప్రోత్సాహం లభిస్తుందని పేర్కొన్నారు.
కామారెడ్డి పట్టణానికి చెందిన విద్యార్థులు రాష్ట్ర స్థాయిలో ప్రథమ, ద్వితీయ ర్యాంకులు సాధించడం పట్ల సాందీపని కళాశాల యాజమాన్యం, అధ్యాపకులు, విద్యార్థులు, తల్లిదండ్రులు హర్షం వ్యక్తం చేశారు. ఈ విజయం విద్యార్థుల కృషి, తల్లిదండ్రుల ప్రోత్సాహం, అధ్యాపకుల మార్గదర్శకత్వానికి నిదర్శనమని వారు పేర్కొన్నారు.
రాష్ట్ర స్థాయిలో అత్యుత్తమ ప్రతిభ కనబరిచిన ఐమాన్ మసీర, ఆస్మా జబీన్లను పలువురు ప్రజాప్రతినిధులు, విద్యావేత్తలు, కళాశాల యాజమాన్యం అభినందిస్తూ.. భవిష్యత్తులో మరిన్ని ఉన్నత విజయాలు సాధించాలని ఆకాంక్షించారు.
Post a Comment