Nizamsagar | నిజాంసాగర్ ప్రాజెక్ట్ వద్ద తప్పిన పెను ప్రమాదం

వన మహోత్సవంలో కామారెడ్డి జిల్లా పురోగతి

ఇప్పటివరకు 17.78 లక్షల మొక్కలు నాటాం : కలెక్టర్ ప్రతిమా సింగ్

కామారెడ్డి, ఆగస్టు 24: వన మహోత్సవం-2026 లక్ష్యాలను సెప్టెంబర్ చివరి వారంలోగా 100 శాతం పూర్తి చేయాలని రాష్ట్ర అటవీ, పర్యావరణ, దేవాదాయ శాఖ మంత్రి కొండా సురేఖ ఆదేశించారు.

సోమవారం మంత్రి హైదరాబాద్ నుంచి పీసీసీఎఫ్ వినయ్ కుమార్ తో కలిసి అన్ని జిల్లాల కలెక్టర్లు, అటవీ అధికారులతో సమీక్ష నిర్వహించారు. రాష్ట్రవ్యాప్తంగా 56 శాతం లక్ష్యాలు పూర్తయ్యాయని, మొక్కల సంరక్షణ, ట్రీగార్డ్స్ ఏర్పాటు, అర్బన్ ఫారెస్టుల అభివృద్ధిపై దృష్టి పెట్టాలని మంత్రి సూచించారు.

కామారెడ్డి జిల్లాలో 72 శాతం లక్ష్యం పూర్తి

సమీక్షలో జిల్లా కలెక్టర్ ప్రతిమా సింగ్ మాట్లాడుతూ జిల్లా పురోగతిని వివరించారు.

> "కామారెడ్డి జిల్లాకు వన మహోత్సవంలో 24.66 లక్షల మొక్కల లక్ష్యం నిర్దేశించగా, ఇప్పటివరకు 17.78 లక్షల మొక్కలు నాటడం జరిగింది. అంటే 72 శాతం లక్ష్యం పూర్తయింది. నిర్దేశిత గడువులోగా 100 శాతం లక్ష్యాలను సాధించేందుకు అన్ని శాఖల అధికారుల సమన్వయంతో కృషి చేస్తున్నాం" అని కలెక్టర్ తెలిపారు.

ఈ కార్యక్రమంలో జిల్లా అటవీ అధికారి నీరజ్, డీఆర్డీఏ అధికారి దామోదర్ రెడ్డి, అదనపు కలెక్టర్ (స్థానిక సంస్థలు) ఎన్.వై. గిరి తదితరులు పాల్గొన్నారు.

================

ప్రజావాణి ఫిర్యాదులను సత్వరమే పరిష్కరించాలి: అదనపు కలెక్టర్ విక్టర్

కామారెడ్డి, ఆగస్టు 24: ప్రజావాణి ద్వారా అందిన ఫిర్యాదులను సత్వరమే పరిష్కరించాలని అదనపు కలెక్టర్ (రెవెన్యూ) విక్టర్ అధికారులను ఆదేశించారు.

సోమవారం IDOC లో నిర్వహించిన ప్రజావాణి కార్యక్రమంలో ఆయన ప్రజల నుంచి ఫిర్యాదులు స్వీకరించారు. ఈసారి మొత్తం 65 ఫిర్యాదులు అందాయి.

ప్రజలు తమ భూ సమస్యలు, ప్రభుత్వ సేవలు, సంక్షేమ పథకాలకు సంబంధించిన సమస్యలను అదనపు కలెక్టర్ దృష్టికి తీసుకువచ్చారు. వాటిని సంబంధిత శాఖల అధికారులకు పంపించి నిబంధనల ప్రకారం పరిశీలించి సత్వరమే పరిష్కరించాలని ఆయన సూచించారు.

ప్రతి ఫిర్యాదును బాధ్యతాయుతంగా పరిశీలించి అర్హత ఉన్న వాటిని నిర్ణీత గడువులోగా పరిష్కరించాలని, ఫిర్యాదుల పరిష్కారంలో నిర్లక్ష్యం వహించకుండా ప్రత్యేక శ్రద్ధ తీసుకోవాలని అధికారులను ఆదేశించారు.

ఈ కార్యక్రమంలో అదనపు కలెక్టర్ (స్థానిక సంస్థలు) ఎన్.వై. గిరి, జిల్లా పరిషత్ సీఈఓ చందర్, డీఆర్ఓ పాండు, జిల్లా అధికారులు పాల్గొన్నారు.

============

సంస్థాగత ప్రాంగణాల భద్రతకు ప్రత్యేక చర్యలు: కామారెడ్డిలో కలెక్టరేట్ కీలక నిర్ణయాలు

కామారెడ్డి, ఆగస్టు 24: జిల్లాలోని ప్రభుత్వ కార్యాలయాలు, ఆసుపత్రులు, విద్యాసంస్థలు, క్రీడా సముదాయాలు, బస్ స్టాండ్లు, రైల్వే స్టేషన్లలో వీధికుక్కల బెడద నివారణకు జిల్లా సంస్థాగత ప్రాంగణాల భద్రతా కమిటీ కీలక నిర్ణయాలు తీసుకుంది.

ఇన్ చార్జి జిల్లా కలెక్టర్ ప్రతిమా సింగ్ పర్యవేక్షణలో, అదనపు కలెక్టర్ (స్థానిక సంస్థలు) ఎన్.వై. గిరి కన్వీనర్ గా కమిటీ పనిచేయనుంది. సోమవారం జరిగిన సమీక్షలో అదనపు కలెక్టర్ విక్టర్ మాట్లాడుతూ వీధికుక్కల నియంత్రణకు అన్ని శాఖలు సమన్వయంతో పనిచేయాలని సూచించారు.

కమిటీ తీసుకున్న నిర్ణయాలు:

1. ప్రాంగణాల్లోకి కుక్కలు రాకుండా చర్యలు: అన్ని సంస్థాగత ప్రాంగణాల్లో గేట్లు, ప్రహరీ గోడలు, చెత్త నిర్వహణ ప్రాంతాలను పటిష్టంగా నిర్వహించాలి. నోడల్ అధికారులను నియమించి కుక్కల ప్రవేశం, దాడుల వివరాలు నమోదు చేయాలి.

2. మున్సిపాలిటీలు, పంచాయతీల బాధ్యత: వీధికుక్కల స్టెరిలైజేషన్, వ్యాక్సినేషన్, మానవీయ నిర్వహణ చర్యలను స్థానిక సంస్థలు చేపట్టాలి.

3. పశుసంవర్ధక శాఖ సమన్వయం: స్టెరిలైజేషన్, వ్యాక్సినేషన్ కు సాంకేతిక మార్గదర్శకత్వం ఇవ్వడంతో పాటు నివేదికలు సమర్పించాలి.

4. వ్యాక్సిన్ అందుబాటు: అన్ని ప్రభుత్వ ఆసుపత్రుల్లో యాంటీ రేబిస్ వ్యాక్సిన్ (ARV), రేబిస్ ఇమ్యూనోగ్లోబ్యులిన్ (RIG) తగినంతగా అందుబాటులో ఉంచాలని వైద్య ఆరోగ్య శాఖను ఆదేశించారు.

5. అవగాహన, నెలవారీ సమీక్ష: విద్యార్థులు, సిబ్బంది, ప్రయాణికులకు అవగాహన కార్యక్రమాలు నిర్వహించాలి. కమిటీ నెలకు ఒకసారి సమీక్ష నిర్వహించి అమలు తీరును పరిశీలిస్తుంది.

కుక్క కాటు వేసిన వెంటనే గాయాన్ని సబ్బుతో కడిగి, ఆలస్యం చేయకుండా సమీప ప్రభుత్వ ఆసుపత్రిలో చికిత్స పొందాలని, రేబిస్ లక్షణాలు వచ్చాక ప్రమాదకరమని అధికారులు ప్రజలకు విజ్ఞప్తి చేశారు.