 |
| నవజాత బాలుడిని ఎండలో వదిలేసిన దృశ్యం |
•ఆ చిన్నారి ఏడుపు విని పరుగెత్తుకొచ్చిన మదీనా కాలనీ
• తల్లి వదిలేసినా... గల్లీ అక్కున చేర్చుకుంది...!
• మానవత్వం పరిమలించిన వేళ...!!
(తెలంగాణ డైలీ న్యూస్-బాన్సువాడ)
అది గురువారం మిట్ట మధ్యాహ్నం... మండుతున్న ఎండలు... బాన్సువాడ మదీనా కాలనీలోని ఓ మూలకున్న నిర్మానుష్య ప్రదేశం నుంచి చిన్నగా ఏడుపు వినిపించింది.... ఎవరో పసికందు గొంతు.... ఆ ఏడుపు విన్న పక్కింటి మహిళ పరుగున వెళ్లి చూసింది.... గుడ్డల్లో చుట్టి వదిలేసిన నవజాత మగ శిశువు.... బొడ్డు కూడా సరిగ్గా తీయలేదు.... బహుశా కొన్ని గంటల క్రితమే పుట్టి ఉంటాడు.... కాలనీ వాసులు సకాలంలో స్పందించడంతో శిశువు ప్రాణాలు దక్కాయి!!
"నా కొడుకు వయసే. చూడగానే గుండె తరుక్కుపోయింది" అంటూ కళ్లు చెమర్చాయి ఆ మహిళకు... వెంటనే చుట్టుపక్కల వారిని పిలిచింది... నిమిషాల్లోనే కాలనీ మొత్తం అక్కడ గుమిగూడింది... ఎవరో దుప్పటి తెచ్చారు... ఎవరో పాలు... మరొకరు పోలీసులకు ఫోన్ చేశారు...
"ఎండలో అలా పడేసిపోతే ఏమైపోయేవాడో. పాపం, తల్లి ఎలా మనసొప్పిందో" అంటూ కొందరు మహిళలు కన్నీళ్లు పెట్టుకున్నారు. పోలీసులు వచ్చే వరకు కాలనీ మహిళలంతా ఆ చిన్నారిని కంటికి రెప్పలా కాపాడారు. చేతులు మారుస్తూ, లాలిస్తూ, జోల పాడుతూ ఓదార్చారు.
బాన్సువాడ పోలీసులు ఘటనా స్థలానికి చేరుకొని శిశువును వెంటనే ప్రభుత్వ ఆసుపత్రికి తరలించారు. డాక్టర్లు పరీక్షించి శిశువు ఆరోగ్యంగా ఉన్నట్లు తెలపడంతో అందరూ ఊపిరి పీల్చుకున్నారు.
"తల్లి వదిలేసినా, ఈ కాలనీ తల్లులైంది ఆ బిడ్డకు" అని స్థానికులు అన్నారు. ప్రస్తుతం శిశువును శిశు సంరక్షణ కేంద్రానికి తరలించారు. పోలీసులు కేసు నమోదు చేసి తల్లిదండ్రుల కోసం గాలిస్తున్నారు.
ఎవరు కన్నారో తెలియదు. ఎందుకు వదిలేశారో తెలియదు. కానీ ఆ ఒక్క ఏడుపు విని మదీనా కాలనీ మొత్తం తల్లిగా మారిన మానవత్వం మాత్రం అందరి మనసును కదిలించింది.
ఘటన వివరాలు:
బాన్సువాడ పట్టణంలోని మదీనా కాలనీలో గుర్తు తెలియని వ్యక్తులు నవజాత మగ శిశువును వదిలివెళ్లిన ఘటన చోటు చేసుకుంది.
మదీనా కాలనీ నివాస ప్రాంతంలో ఎవరికీ కనిపించని ప్రదేశంలో గుర్తు తెలియని వ్యక్తులు నవజాత శిశువును వదిలి వెళ్లారు. ఈ శిశువు నేడే పుట్టి ఉంటుందని స్థానికులు తెలిపారు.
విషయం తెలుసుకున్న స్థానికులు, వార్డు కౌన్సిలర్ భర్త ఫెరోజ్, మాజీ కౌన్సిలర్ భర్త అమర్ వెంటనే పోలీసులకు సమాచారం అందించారు. పోలీసులు ఘటనా స్థలానికి చేరుకొని శిశువును ప్రభుత్వ ఆసుపత్రికి తరలించారు. పోలీసులు వచ్చే వరకు స్థానిక ప్రజలు శిశువుకు రక్షణ కల్పించడంతో ప్రాణాపాయం తప్పింది.
Post a Comment