Jewllary Shares Down | పీఎం మోదీ ప్రకటనతో కుప్ప కూలిన జ్యువెలరీ షేర్లు

పీఎం మోదీ ప్రకటనతో కుప్ప కూలిన జ్యువెలరీ షేర్లు

బంగారం కొనొద్దు, వర్క్ ఫ్రమ్ హోమ్ పాటించండి: ప్రధాని సూచన  

తెలంగాణ డైలీ న్యూస్, హైదరాబాద్:

హైదరాబాద్‌లో జరిగిన కార్యక్రమంలో ప్రధానమంత్రి నరేంద్ర మోదీ చేసిన కీలక ప్రకటనతో సోమవారం ఉదయం స్టాక్ మార్కెట్‌లో జ్యువెలరీ షేర్లు భారీగా పతనమయ్యాయి. టైటాన్, కళ్యాణ్ జ్యువెలర్స్, సెన్కో గోల్డ్, గోల్డియం ఇంటర్నేషనల్ వంటి ప్రముఖ బంగారు స్టాక్‌లు ఒక్కసారిగా కుప్పకూలాయి.

ప్రధాని మోదీ తన ప్రసంగంలో సంవత్సరం పాటు బంగారం కొనుగోళ్లను నిలిపివేయాలని దేశ ప్రజలకు సూచించారు. బంగారాన్ని కొనకుండా ఉండాలని, అనవసర దేశీయ, అంతర్జాతీయ ప్రయాణాలను తగ్గించుకోవాలని, వర్క్ ఫ్రమ్ హోమ్ పద్ధతులను మళ్లీ అవలంబించాలని కోరారు. కరోనా సమయంలో వాడిన ఆన్‌లైన్ సమావేశాలు, వీడియో కాన్ఫరెన్స్‌లను తిరిగి ప్రారంభించడం జాతీయ ప్రయోజనాలకు అత్యవసరమని అభిప్రాయపడ్డారు.

ప్రపంచవ్యాప్తంగా బ్రెంట్ క్రూడ్ ఆయిల్ ధరలు పెరుగుతున్నందున దేశీయ ఆయిల్ మార్కెటింగ్ కంపెనీలు భారీ నష్టాలు ఎదుర్కొంటున్న నేపథ్యంలోనే ఈ ప్రకటన చేశారు. సప్లై చైన్‌పై ఒత్తిడిని తగ్గించి ఆర్థిక వ్యవస్థకు ఉపశమనం కల్పించడమే దీని ఉద్దేశ్యమని విశ్లేషకులు చెబుతున్నారు. అయితే దీని ప్రభావం బులియన్ మార్కెట్‌పై తీవ్రంగా పడింది.

షేర్ల పతనం వివరాలు:  

కళ్యాణ్ జ్యువెలర్స్ షేర్ బీఎస్ఈలో రూ. 389.50 వద్ద 8.28 శాతం నష్టంతో ట్రేడ్ అయింది. శుక్రవారం రూ. 424.65 వద్ద 3.28 శాతం లాభంతో ముగిసింది. మార్కెట్ క్యాపిటలైజేషన్ రూ. 43,855.31 కోట్లుగా ఉంది.

సెన్కో గోల్డ్ షేర్ దాదాపు 11 శాతం పతనమై రూ. 327.4 వద్ద 10.48 శాతం నష్టంతో ట్రేడ్ అవుతోంది. మార్కెట్ క్యాప్ రూ. 5,361.39 కోట్లకు పడిపోయింది. శుక్రవారం రూ. 365.45 వద్ద 6.36 శాతం లాభంతో ముగిసిన ఈ స్టాక్, మోదీ ప్రకటనతో క్యాపిటలైజేషన్‌లో సుమారు 500 కోట్ల రూపాయలు నష్టపోయింది.

టైటాన్ షేరు రూ. 4,226 వద్ద 6.37 శాతం నష్టంతో ట్రేడ్ అయింది. శుక్రవారం రూ. 4,513.4 వద్ద 4.76 శాతం లాభంతో ముగిసిన ఈ స్టాక్, ఒక్కో షేర్‌పై దాదాపు 300 రూపాయల మేర నష్టపోయింది.

మరోవైపు వజ్రాలు, ఆభరణాల ఎగుమతులు అయిదేళ్ల కనిష్టానికి చేరుకున్నాయి. అమెరికాకు ఎగుమతులు దాదాపు సగానికి తగ్గాయి. జెమ్ అండ్ జ్యువెలరీ ఎగుమతుల ప్రోత్సాహక మండలి గణాంకాల ప్రకారం 2026-27 ఆర్థిక సంవత్సరంలో రత్నాలు, ఆభరణాల ఎగుమతులు 27.72 బిలియన్ డాలర్లకు పడిపోయాయి. ఈ పతనం భారత ఆర్థిక వ్యవస్థపై టారిఫ్‌ల ప్రభావానికి అద్దం పడుతోంది.