•బేతాళ స్వామి జాతరలో అపస్మారక స్థితిలో పడిపోయిన బాలిక
•సకాలంలో స్పందించి ఆసుపత్రికి తరలించిన టౌన్ సీఐ శ్రీధర్
"అమ్మా!" అని అరిచిందే ఆలస్యం – పోలీస్ జీపే అంబులెన్స్గా మారింది
తెలంగాణ డైలీ న్యూస్, బాన్సువాడ:
బేతాళ స్వామి జాతర....గుడి చుట్టూ జనం పోటెత్తారు... డప్పుల మోత, భక్తుల కేరింతల మధ్య గౌలిగూడకు చెందిన 13 ఏళ్ల లక్ష్మి తల్లితో కలిసి దర్శనానికి వచ్చింది... ఎండ వేడి, ఉక్కపోత, జనం తోపులాట... ఉన్నట్టుండి లక్ష్మి కళ్లు తిరిగినట్టయ్యాయి. "అమ్మా" అని ఒక్కసారిగా అరిచి అక్కడికక్కడే కుప్పకూలింది.
తల్లి గుండె ఆగినంత పనైంది. చుట్టూ జనం మూగారు కానీ ఏం చేయాలో తెలియని అయోమయం. సరిగ్గా అదే సమయంలో బందోబస్తులో ఉన్న టౌన్ సీఐ శ్రీధర్ కంటపడింది ఆ దృశ్యం.
ఒక్క క్షణం ఆలస్యం చేయలేదు. "సైడ్ ఇవ్వండి, సైడ్ ఇవ్వండి" అంటూ జనాన్ని పక్కకు జరిపి, సిబ్బందితో కలిసి పరుగున వచ్చారు. అపస్మారక స్థితిలో ఉన్న లక్ష్మిని ఎత్తుకొని నేరుగా తన పోలీస్ జీపు వైపు పరిగెత్తారు.
"ఆసుపత్రికి పోనీయండి, త్వరగా" అంటూ డ్రైవర్కు చెప్పి, తాను కూడా జీపు ఎక్కారు. సైరన్ మోగిస్తూ జీపు జనాన్ని చీల్చుకుంటూ ప్రభుత్వ ఆసుపత్రికి దూసుకెళ్లింది. దారి పొడవునా సీఐ శ్రీధర్ లక్ష్మి తల్లిని ధైర్యం చెబుతూనే, ఆసుపత్రి సిబ్బందికి ఫోన్ చేసి అన్నీ సిద్ధంగా ఉంచమన్నారు.
ఆసుపత్రికి చేరేసరికి డాక్టర్లు సిద్ధంగా ఉన్నారు. వెంటనే చికిత్స మొదలైంది. అరగంట తర్వాత లక్ష్మి కళ్లు తెరిచింది. తల్లి కన్నీళ్లు ఆనంద భాష్పాలుగా మారాయి.
"సార్ మీరు దేవుడితో సమానం. మీరు లేకపోతే నా బిడ్డ దక్కేది కాదు" అంటూ లక్ష్మి తల్లి సీఐ శ్రీధర్ కు ధన్యవాదాలు తెలపగా... వారించి "ఇది మా డ్యూటీ అమ్మా. జాతరకు వచ్చిన ప్రతి ఒక్కరి క్షేమం మా బాధ్యత" అని భుజం తట్టి ధైర్యం చెప్పారు సీఐ.
ఖాకీ డ్రెస్లో కనిపించే కఠినత్వం వెనుక ఉన్న మానవత్వం ఆ రోజు బాన్సువాడ జాతరలో అందరికీ కనిపించింది. భక్తులు చప్పట్లతో పోలీసులకు సెల్యూట్ చేశారు.
ప్రస్తుతం లక్ష్మి ఆరోగ్యం నిలకడగా ఉందని వైద్యులు తెలిపారు.
(వీడియో 👇)
Post a Comment