గుండెపోటుతో మృతి, పోలీస్ శాఖ తీవ్ర దిగ్భ్రాంతి
కుటుంబానికి అండగా ఉంటామని ఎస్పీ రాజేష్ చంద్ర హామీ
మంత్రి ఉత్తమ్ కుమార్ రెడ్డిని మర్యాదపూర్వకంగా కలిసిన ఇన్చార్జి సీపీ
తెలంగాణ డైలీ న్యూస్, కామారెడ్డి, జూన్ 10: గాంధారి పోలీస్ స్టేషన్ కానిస్టేబుల్ కురుపాటి రఘు గుండెపోటుతో నిన్న ఆకస్మికంగా మరణించడంపై జిల్లా పోలీసు శాఖ తీవ్ర దిగ్భ్రాంతి వ్యక్తం చేసింది.
ఎస్పీ పరామర్శ
జిల్లా ఎస్పీ యం. రాజేష్ చంద్ర, ఈ రోజు బాన్సువాడలోని మృతుని నివాసానికి వెళ్లి కుటుంబ సభ్యులను పరామర్శించారు. రఘు భార్య రజిని, కుమార్తెలు రసజ్ఞ 8వ తరగతి, అమూల్య 6వ తరగతి, తల్లి చంద్రకళను ఓదార్చి ప్రగాఢ సానుభూతి తెలియజేశారు.
నిబద్ధత గల కానిస్టేబుల్
ఈ సందర్భంగా ఎస్పీ మాట్లాడుతూ, 2012 బ్యాచ్కు చెందిన కానిస్టేబుల్ కురుపాటి రఘు విధి నిర్వహణలో నిబద్ధత, క్రమశిక్షణ, అంకితభావంతో పనిచేసే పోలీస్ సిబ్బందిలో ఒకరని పేర్కొన్నారు. ఆయన మరణంతో పోలీస్ శాఖ ఒక మంచి కానిస్టేబుల్ను, కర్తవ్యనిరతిగల సహచరుడిని కోల్పోయిందని ఆవేదన వ్యక్తం చేశారు.
కుటుంబానికి అండగా ఉంటాం
రఘు కుటుంబానికి జిల్లా పోలీస్ శాఖ అన్ని విధాలుగా అండగా ఉంటుందని ఎస్పీ హామీ ఇచ్చారు. కుటుంబ సభ్యులు ధైర్యంగా ఉండాలని, ముఖ్యంగా పిల్లల భవిష్యత్తును దృష్టిలో ఉంచుకుని మనోధైర్యాన్ని కోల్పోకుండా ముందుకు సాగాలని సూచించారు.
ఘన నివాళులు
రఘు సేవలను స్మరించుకుంటూ జిల్లా పోలీసు శాఖ తరఫున ఘన నివాళులు అర్పించిన ఎస్పీ, ఆయన అంకితభావం, సేవా తపన పోలీస్ శాఖలో చిరస్థాయిగా గుర్తుండిపోతాయని పేర్కొన్నారు. "కర్తవ్య నిర్వహణలో నిబద్ధతతో పనిచేసిన కానిస్టేబుల్ కురుపాటి రఘు సేవలు ఎల్లప్పుడూ స్ఫూర్తిదాయకంగా నిలిచిపోతాయి. ఆయన ఆత్మకు శాంతి చేకూరాలని కోరుకుంటూ, కుటుంబ సభ్యులకు ప్రగాఢ సానుభూతిని తెలియజేస్తున్నాను" అని ఎస్పీ అన్నారు.
హాజరైన అధికారులు
ఈ కార్యక్రమంలో బాన్సువాడ టౌన్ ఎస్హెచ్ఓ శ్రీధర్, బాన్సువాడ రూరల్ సర్కిల్ ఇన్స్పెక్టర్ తిరుపయ్య, సదాశివనగర్ సర్కిల్ ఇన్స్పెక్టర్ బి. సంతోష్ కుమార్, గాంధారి ఎస్ఐ మహేందర్, పోలీసు సిబ్బంది పాల్గొన్నారు.
మంత్రి పర్యటన సందర్భంగా భద్రతా ఏర్పాట్లు
నీటిపారుదల, పౌర సరఫరాలు ఆహార శాఖ మంత్రి ఎన్. ఉత్తమ్ కుమార్ రెడ్డి నిజామాబాద్ జిల్లా పర్యటనకు విచ్చేసిన సందర్భంగా, ఇన్చార్జి కమిషనర్ ఆఫ్ పోలీస్ యం. రాజేష్ చంద్ర మర్యాదపూర్వకంగా కలిసి పుష్పగుచ్ఛం అందజేసి స్వాగతం పలికారు.
ఈ సందర్భంగా మంత్రి పర్యటనకు సంబంధించిన భద్రతా మరియు బందోబస్తు ఏర్పాట్లను ఇన్చార్జి సీపీ పరిశీలించారు. పర్యటన సజావుగా, ప్రశాంత వాతావరణంలో జరిగేలా చేపట్టిన భద్రతా చర్యలపై అధికారులతో సమీక్ష నిర్వహించారు. ప్రజలకు ఎటువంటి అసౌకర్యం కలగకుండా అవసరమైన అన్ని ఏర్పాట్లు చేయాలని సంబంధిత అధికారులకు సూచనలు చేశారు.
Post a Comment