بانسواڑہ کے بیرکور منڈل میں انسانیت سوز واقعہ: 8 ماہ کی معصوم بچی پر بلیڈ کے وار،

 

24 గంటల్లో కిడ్నాప్ కేసు ఛేదన

మహారాష్ట్రకు తరలించిన 6 ఏళ్ల బాలికను రక్షించిన మద్నూర్ పోలీసులు  

సీసీటీవీ, టెక్ ఆధారాలతో నిందితుడు అరెస్ట్ 

చిన్నారుల నేరాలపై జీరో టాలరెన్స్ - ఎస్పీ హెచ్చరిక

 తెలంగాణ డైలీ న్యూస్, కామారెడ్డి :

కామారెడ్డి జిల్లా మద్నూర్ పోలీస్ స్టేషన్ పరిధిలో జరిగిన 6 ఏళ్ల మైనర్ బాలిక కిడ్నాప్ కేసును పోలీసులు కేవలం 24 గంటల్లోనే ఛేదించారు. బాలికను మహారాష్ట్రకు తరలించి విక్రయించేందుకు ప్రయత్నించిన నిందితుడిని అరెస్ట్ చేసి, బాలికను క్షేమంగా రక్షించి తల్లిదండ్రులకు అప్పగించారు.

ఫిర్యాదు అందగానే రంగంలోకి పోలీసులు

నిజామాబాద్‌కు వెళ్లిన బాలిక తల్లి ఇంటి వద్ద తన కుమార్తెను వదిలి వెళ్లింది. ఆ సమయంలో కుటుంబ సభ్యులకు పరిచయస్తుడైన నిందితుడు మోసపూరితంగా బాలికను అపహరించాడు. బాలిక కనిపించకపోవడంతో కుటుంబ సభ్యులు మద్నూర్ పోలీస్ స్టేషన్‌లో ఫిర్యాదు చేశారు. ఫిర్యాదు అందిన వెంటనే కేసు నమోదు చేసి దర్యాప్తు ప్రారంభించారు.

4 ప్రత్యేక బృందాలు - విస్తృత గాలింపు

జిల్లా ఎస్పీ  యం. రాజేష్ చంద్ర ఆదేశాలతో బాన్సువాడ డీఎస్పీ పర్యవేక్షణలో 4 ప్రత్యేక బృందాలను ఏర్పాటు చేశారు. సీసీటీవీ దృశ్యాలు, సాంకేతిక ఆధారాలు, ఇంటెలిజెన్స్ సమాచారాన్ని విశ్లేషిస్తూ విస్తృతంగా గాలింపు చర్యలు చేపట్టారు.

కామారెడ్డి నుంచి మహారాష్ట్రకు తరలింపు

దర్యాప్తులో నిందితుడు బాలికను ఆటోలో మహారాష్ట్రలోని దెగ్లూర్ ప్రాంతానికి తీసుకెళ్లినట్లు తేలింది. ఎవరికీ అనుమానం రాకుండా అక్కడ కొత్త బట్టలు, గాజులు, కాళ్ల పట్టీలు కొనిచ్చాడు. 

విక్రయ ప్రయత్నం విఫలం

ఆ తర్వాత నాందేడ్, ఔరంగాబాద్ ప్రాంతాలకు తీసుకెళ్లి బాలికను విక్రయించేందుకు పలుమార్లు ప్రయత్నించాడు. అది సాధ్యం కాకపోవడంతో తిరిగి దెగ్లూర్‌కు వచ్చాడు.

దెగ్లూర్‌లో అరెస్ట్ - బాలిక రక్షణ

దెగ్లూర్‌లో బాలికతో అనుమానాస్పదంగా సంచరిస్తున్న నిందితుడిని మద్నూర్ పోలీసులు గుర్తించి అదుపులోకి తీసుకున్నారు. విచారణలో త్వరగా డబ్బు సంపాదించాలనే దురాశతో ముందస్తు పథకంతో బాలికను కిడ్నాప్ చేసి విక్రయించేందుకు ప్రయత్నించినట్లు అతడు ఒప్పుకున్నాడు. 

నిందితుడి వద్ద నుంచి రైలు టికెట్, బాలిక పాత దుస్తులను స్వాధీనం చేసుకున్నారు. అనంతరం బాలికను క్షేమంగా రక్షించి తల్లిదండ్రులకు అప్పగించారు.

నిందితుడి వివరాలు

*పేరు*: హర్నే రాజేందర్  

*తండ్రి పేరు*: గోవింద్  

*వయసు*: 42 సంవత్సరాలు  

*నివాసం*: తాడిహిప్పర్గ గ్రామం, మద్నూర్ మండలం  

నిందితుడిని అరెస్ట్ చేసి న్యాయస్థానంలో హాజరుపరిచినట్లు మద్నూర్ ఎస్‌ఐ  రాజు తెలిపారు.

ఎస్పీ సూచనలు - జీరో టాలరెన్స్

ఈ సందర్భంగా జిల్లా ఎస్పీ యం. రాజేష్ చంద్ర మాట్లాడుతూ, చిన్నారుల భద్రత విషయంలో తల్లిదండ్రులు అత్యంత అప్రమత్తంగా ఉండాలని సూచించారు. పిల్లలను అపరిచితుల వద్ద ఒంటరిగా వదిలివేయవద్దని, అనుమానాస్పద వ్యక్తులను గమనిస్తే వెంటనే సమీప పోలీస్ స్టేషన్‌కు లేదా డయల్-100కు సమాచారం ఇవ్వాలని కోరారు.  

"చిన్నారులపై నేరాల విషయంలో జిల్లా పోలీసులు జీరో టాలరెన్స్ విధానంతో పనిచేస్తున్నాం. ఇలాంటి నేరాలకు పాల్పడే వారిపై చట్టప్రకారం కఠిన చర్యలు తీసుకుంటాం" అని ఆయన హెచ్చరించారు.

24 గంటల్లో కేసును ఛేదించి బాలికను రక్షించిన బృందాన్ని ఎస్పీ అభినందించారు.