బక్రీద్కు పటిష్ట భద్రతా ఏర్పాట్లు
అక్రమ పశువుల రవాణాపై ప్రత్యేక నిఘా: ఎస్పీ రాజేష్ చంద్ర
తెలంగాణ డైలీ న్యూస్, కామారెడ్డి: బక్రీద్ పండుగ నేపథ్యంలో జిల్లాలో ఎలాంటి అవాంఛనీయ సంఘటనలు చోటు చేసుకోకుండా పటిష్ట భద్రతా ఏర్పాట్లు చేస్తున్నామని జిల్లా ఎస్పీ రాజేష్ చంద్ర తెలిపారు.
వీడియో కాన్ఫరెన్స్ ద్వారా సమీక్ష
మంగళవారం జిల్లా పోలీస్ కార్యాలయం నుంచి ఎస్పీ గారు జిల్లాలోని పోలీసు అధికారులు, సిబ్బందితో వీడియో కాన్ఫరెన్స్ నిర్వహించారు. ఈ సమావేశంలో జిల్లా అదనపు ఎస్పీ శ్రీ నరసింహారెడ్డి, డీఎస్పీలు, స్పెషల్ బ్రాంచ్ ఇన్స్పెక్టర్ మధుసూదన్, సీఐలు, ఎస్ఐలు, ఇతర పోలీసు సిబ్బంది పాల్గొన్నారు.
ఈద్గాలు, మసీదుల వద్ద కట్టుదిట్టమైన బందోబస్తు
బక్రీద్ను ప్రజలందరూ ప్రశాంత వాతావరణంలో, పరస్పర సహకారంతో, మత సామరస్యంతో జరుపుకునేలా పోలీస్ శాఖ పూర్తి సమన్వయంతో పనిచేయాలని ఎస్పీ ఆదేశించారు. జిల్లాలోని ప్రధాన ప్రార్థనా స్థలాలు, ఈద్గాలు, మసీదులు, ముఖ్య రహదారులు, మార్కెట్ ప్రాంతాలు, జనసంచారం అధికంగా ఉండే ప్రదేశాలలో కట్టుదిట్టమైన పోలీస్ బందోబస్తు ఏర్పాటు చేయాలని సూచించారు.
ట్రాఫిక్, పార్కింగ్ ఏర్పాట్లు
పండుగ రోజున రద్దీ ప్రాంతాలలో ట్రాఫిక్ సమస్యలు తలెత్తకుండా ముందస్తు ప్రణాళికలు రూపొందించాలని, వాహన రాకపోకలను సజావుగా నిర్వహించాలని ఆదేశించారు. ఈద్గాల వద్ద పటిష్టమైన పార్కింగ్ ఏర్పాట్లు, అవసరమైన చోట్ల ట్రాఫిక్ మళ్లింపులు చేపట్టాలని, అంబులెన్స్, ఫైర్ వంటి అత్యవసర సేవలకు ఆటంకం కలగకుండా ప్రత్యేక అత్యవసర మార్గాలు ఏర్పాటు చేయాలని స్పష్టం చేశారు.
సోషల్ మీడియాపై కఠిన నిఘా
సామాజిక మాధ్యమాల ద్వారా అసత్య ప్రచారాలు, మత విద్వేషాలను రెచ్చగొట్టే పోస్టులు లేదా వదంతులు వ్యాప్తి చెందకుండా సైబర్ మానిటరింగ్ను మరింత బలోపేతం చేయాలని ఎస్పీ తెలిపారు. సోషల్ మీడియా గ్రూప్ అడ్మిన్లు బాధ్యతాయుతంగా వ్యవహరించాలని, మత విద్వేషాలు, రెచ్చగొట్టే పోస్టులు షేర్ చేసినా లేదా అనుమతించినా గ్రూప్ అడ్మిన్లపై కూడా చట్టపరమైన చర్యలు తీసుకుంటామని హెచ్చరించారు.
చెక్పోస్టుల వద్ద 24/7 నిఘా
గత అనుభవాలను దృష్టిలో ఉంచుకొని సున్నిత ప్రాంతాలలో ప్రత్యేక నిఘా విభాగాలు ఏర్పాటు చేయాలని, సీసీ కెమెరాల నిరంతర పర్యవేక్షణతో భద్రతా చర్యలను కట్టుదిట్టం చేయాలని పేర్కొన్నారు. జిల్లా సరిహద్దుల్లోని చెక్ పోస్టుల వద్ద 24 గంటల పాటు సిబ్బంది విధులు నిర్వహించాలని, పశువుల అక్రమ రవాణాను అరికట్టేందుకు మునిసిపల్, రెవెన్యూ అధికారులతో సమన్వయం పాటిస్తూ గట్టి నిఘా ఉంచాలని ఆదేశించారు.
పండుగ విధుల్లో అప్రమత్తంగా ఉండాలి
పండుగ విధుల్లో పాల్గొనే పోలీసు అధికారులు, సిబ్బంది క్షేత్రస్థాయిలో అప్రమత్తంగా, బాధ్యతాయుతంగా విధులు నిర్వహించాలని ఎస్పీ సూచించారు. బక్రీద్ పండుగను ప్రశాంతంగా, శాంతియుత వాతావరణంలో నిర్వహించేందుకు పోలీస్ శాఖ పూర్తిస్థాయిలో సిద్ధంగా ఉందని భరోసా ఇచ్చారు
.
إرسال تعليق