సిద్ధిపేటలో 2 రోజుల ఉచిత క్యాన్సర్ స్క్రీనింగ్ శిబిరం ప్రారంభం
40 ఏళ్లు దాటిన మహిళలు తప్పనిసరిగా పరీక్షలు చేయించుకోవాలి: హరీశ్ రావు
(దాస శ్రీనివాస్ - సిద్దిపేట బ్యూరో)
వ్యాధి వచ్చిన తర్వాత చికిత్స చేయడం కంటే రాకముందే గుర్తించడం ఉత్తమని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు అన్నారు. ప్రారంభ దశలోనే గుర్తిస్తే క్యాన్సర్ను పూర్తిగా నయం చేయవచ్చని స్పష్టం చేశారు. సిద్ధిపేటలోని విపంచి ఆడిటోరియంలో సింధూ హాస్పిటల్ సహకారంతో 2 రోజుల పాటు జరిగే ఉచిత క్యాన్సర్ నిర్ధారణ శిబిరాన్ని ఆయన ప్రారంభించారు.
హరీశ్ రావు కీలక వ్యాఖ్యలు:
- ఆరోగ్యమే అసలైన సంపద. వ్యాధి రాకముందే స్క్రీనింగ్ చేయించుకోవడం చాలా అవసరం.
- క్యాన్సర్కు భయపడొద్దు. తొలి దశలో పట్టుకుంటే చాలా రకాల క్యాన్సర్లను పూర్తిగా నయం చేయవచ్చు.
- 40 ఏళ్లు దాటిన మహిళలు రొమ్ము క్యాన్సర్, గర్భాశయ ముఖద్వార క్యాన్సర్ పరీక్షలను తప్పనిసరిగా చేయించుకోవాలి.
- జీవనశైలి మార్పులు, ఆహారపు అలవాట్లు క్యాన్సర్ కేసులు పెరగడానికి కారణమవుతున్నాయి.
- పొగాకు, గుట్కా, పాన్ మసాలా నోటి క్యాన్సర్కు ప్రధాన కారణాలు. ఇలాంటి అలవాట్లను కుటుంబ సభ్యులు మానేలా చూడాలి.
ఉచిత పరీక్షల వివరాలు:
ఈ శిబిరంలో మామోగ్రామ్, పాప్ స్మియర్ వంటి పరీక్షలు పూర్తిగా ఉచితంగా చేస్తున్నారు. సాధారణంగా ప్రైవేట్ ఆసుపత్రుల్లో ఇవే పరీక్షలకు వేల రూపాయలు ఖర్చవుతాయని హరీశ్ రావు తెలిపారు. ప్రతి మహిళ ఈ అవకాశాన్ని వినియోగించుకోవాలని కోరారు.
"ఒక మహిళ ఆరోగ్యంగా ఉంటే ఒక కుటుంబం ఆరోగ్యంగా ఉంటుంది. ఒక కుటుంబం ఆరోగ్యంగా ఉంటే సమాజం ఆరోగ్యంగా ఉంటుంది" అని ఆయన అన్నారు.
బీఆర్ఎస్ ప్రభుత్వం ప్రజారోగ్యానికి అత్యంత ప్రాధాన్యత ఇచ్చిందని, జిల్లాల వారీగా మొబైల్ క్యాన్సర్ స్క్రీనింగ్, ఎంఎన్జే క్యాన్సర్ ఆసుపత్రిలో ఆధునిక వైద్య సేవలు, 'ఆరోగ్య మహిళ' వంటి కార్యక్రమాలు అమలు చేశామని గుర్తు చేశారు.ఆర్థికంగా వెనుకబడిన కుటుంబాలకు కూడా నాణ్యమైన వైద్యం అందాలనే ఉద్దేశంతో ఈ శిబిరం ఏర్పాటు చేసినట్లు చెప్పారు.
"స్వచ్ఛ సిద్ధిపేటతో పాటు హెల్తీ సిద్ధిపేట మన లక్ష్యం కావాలి. ప్రతి ఇంట్లో ఉన్న మహిళలను ఈ శిబిరానికి తీసుకువచ్చి ఉచిత పరీక్షలు చేయించండి. ఒక చిన్న పరీక్ష ప్రాణాలను కాపాడగలదు" అని హరీశ్ రావు పిలుపునిచ్చారు. ఈ కార్యక్రమానికి సహకరించిన హైదరాబాద్ సింధూ హాస్పిటల్ వైద్యులు, సిబ్బంది, నిర్వాహకులకు ఆయన ధన్యవాదాలు తెలిపారు.
إرسال تعليق