సీసీ కెమెరాలు, స్థానిక సమాచారంతో నిందితుల పట్టివేత - బిచ్కుంద పోలీసులను అభినందించిన ఎస్పీ రాజేష్ చంద్ర
కామారెడ్డి: బిచ్కుందలో వృద్ధురాలి ఇంట్లో జరిగిన చోరీ కేసును బిచ్కుంద పోలీసులు ఛేదించారు. ముగ్గురు నిందితులను అరెస్ట్ చేసి వారి నుంచి రూ.12,000 నగదును స్వాధీనం చేసుకున్నారు. ఈ వివరాలను బిచ్కుంద ఎస్‌హెచ్‌ఓ జి.రాజు వెల్లడించారు.
ఘటన వివరాలు:
బిచ్కుంద గ్రామానికి చెందిన సుంకరి సాయవ్వ ఈ నెల 14వ తేదీన బంధువుల ఇంట్లో కార్యక్రమానికి వెళ్లారు. ఇల్లు ఖాళీగా ఉండటాన్ని గమనించిన దొంగలు చోరీకి పథకం వేశారు. ఈ నెల 18వ తేదీ అర్ధరాత్రి సుమారు 2 గంటల సమయంలో ఇంటి తలుపులు పగలగొట్టి లోపలికి ప్రవేశించి, పెట్టెలో దాచిన రూ.15,000 నగదును అపహరించారు. బాధితురాలి ఫిర్యాదుతో బిచ్కుంద పోలీస్ స్టేషన్‌లో కేసు నమోదైంది.
ప్రత్యేక బృందాలతో దర్యాప్తు:
జిల్లా ఎస్పీ ఎం.రాజేష్ చంద్ర, ఐపీఎస్ ఆదేశాల మేరకు బాన్సువాడ డీఎస్పీ పర్యవేక్షణలో, బిచ్కుంద సర్కిల్ ఇన్‌స్పెక్టర్ రవికుమార్, ఎస్‌హెచ్‌ఓ రాజు ఆధ్వర్యంలో రెండు ప్రత్యేక బృందాలను ఏర్పాటు చేసి దర్యాప్తు చేపట్టారు. సీసీ కెమెరాల పరిశీలన, స్థానిక సమాచారం ఆధారంగా నిందితుల కోసం గాలింపు చేపట్టారు.
23.10.2026 సాయంత్రం బిచ్కుంద పోలీసులు రాజూల్ల చౌరస్తా, పరమేశ్వర థియేటర్ సమీపంలో గస్తీ నిర్వహిస్తుండగా అనుమానాస్పదంగా సంచరిస్తున్న ముగ్గురిని అదుపులోకి తీసుకుని విచారించగా చోరీ చేసినట్లు అంగీకరించారు.
అరెస్టయిన నిందితులు:
1. దాసరి తిరుపతి (33), తండ్రి నర్సింలు, నివాసం బాన్సువాడ - ఇతనిపై గతంలో బాన్సువాడలో 10 దొంగతనం కేసులు ఉన్నాయి.
2. చౌహాన్ అర్జున్ (29), తండ్రి రామారావు, నివాసం బిచ్కుంద - ఇతనిపై గతంలో బిచ్కుందలో 5 కేసులు ఉన్నాయి.
3. చౌహాన్ సురేష్ (34), తండ్రి సకారామ్, నివాసం బిచ్కుంద.
నిందితులు మద్యానికి అలవాటుపడి డబ్బుల కోసం చోరీకి పాల్పడినట్లు తేలింది. వారి వద్ద నుంచి చోరీకి ఉపయోగించిన ఇనుప రాడ్‌తో పాటు రూ.12,000 నగదును పంచుల సమక్షంలో స్వాధీనం చేసుకున్నారు.
ఈ కేసును సమర్థవంతంగా ఛేదించిన బిచ్కుంద సర్కిల్ ఇన్‌స్పెక్టర్ రవికుమార్, ఎస్‌హెచ్‌ఓ రాజు, సిబ్బందిని జిల్లా ఎస్పీ ఎం.రాజేష్ చంద్ర అభినందించారు.
إرسال تعليق