Bike Accident | మైనర్ బాలుడి బైక్ స్టంట్‌కు అమాయకుడి బలి...!

బాన్సువాడలో ఎస్‌ఐఆర్‌పై బీఎల్ఓ, బీఎల్ఏలకు శిక్షణ  

బిర్కూర్, నస్రుల్లాబాద్, బాన్సువాడ మండలాల్లో శిక్షణ తరగతులు

ఓటరు జాబితా సవరణ పారదర్శకంగా చేపట్టాలి: ఆర్డీఓ రవీందర్ రెడ్డి

తెలంగాణ డైలీ న్యూస్, బాన్సువాడ: ఎలక్షన్ కమిషన్ ఆదేశాల మేరకు చేపట్టిన ప్రత్యేక సవరణ కార్యక్రమం - స్పెషల్ ఇంటెన్సివ్ రివిజన్ (SIR) 2026లో భాగంగా 014-బాన్సువాడ అసెంబ్లీ నియోజకవర్గ పరిధిలో బూత్ లెవల్ ఆఫీసర్లు (BLO), బూత్ లెవల్ ఏజెంట్లకు (BLA) శిక్షణ కార్యక్రమాలు నిర్వహించారు.

శనివారం బాన్సువాడ మండల, పట్టణ బీఎల్ఓ, బీఎల్ఏలకు బాన్సువాడలో శిక్షణ నిర్వహించగా, బిర్కూర్, నస్రుల్లాబాద్ మండలాల బీఎల్ఓ, బీఎల్ఏలకు బిర్కూర్ మండల రైతు వేదికలో శిక్షణ తరగతులు జరిగాయి. ఈ రెండు కార్యక్రమాలకు బాన్సువాడ ఆర్డీఓ రవీందర్ రెడ్డి ముఖ్య అతిథిగా హాజరయ్యారు.

ఈ సందర్భంగా ఆర్డీఓ రవీందర్ రెడ్డి మాట్లాడుతూ, "ఓటరు జాబితా అనేది ప్రజాస్వామ్యానికి పునాది. ఒక్క అర్హుడైన ఓటరు కూడా మిస్ కాకూడదు. అదే సమయంలో డూప్లికేట్, మరణించిన, శాశ్వతంగా వలస వెళ్లిన ఓటర్ల పేర్లు జాబితా నుంచి తొలగించాలి" అని స్పష్టం చేశారు.

"ఎస్‌ఐఆర్ కార్యక్రమం 100% ఖచ్చితత్వంతో, పారదర్శకంగా జరగాలి. బీఎల్ఓలు ఇంటింటి సర్వే చేసి కొత్తగా 18 ఏళ్లు నిండిన యువతను ఓటరుగా నమోదు చేయాలి. ఫారం-6, ఫారం-7, ఫారం-8లను సక్రమంగా నింపి సమర్పించాలి. బీఎల్ఏలు రాజకీయ పార్టీల తరఫున బీఎల్ఓలకు సహకరించి, తమ పార్టీకి సంబంధించిన క్లెయిమ్‌లు, అభ్యంతరాలను నిబంధనల ప్రకారం ఇవ్వాలి" అని సూచించారు.

"ఓటరు జాబితాలో తప్పులు ఉంటే ప్రజల నుంచి తీవ్ర విమర్శలు వస్తాయి. అందుకే క్షేత్రస్థాయిలో మీరు చాలా అప్రమత్తంగా పని చేయాలి. ప్రతి పోలింగ్ కేంద్రంలో బీఎల్ఓ, బీఎల్ఏల సమన్వయం చాలా ముఖ్యం. ఎలాంటి రాజకీయ ఒత్తిళ్లకు లొంగకుండా చట్ట ప్రకారం పని చేయండి" అని ఆర్డీఓ పిలుపునిచ్చారు.

శిక్షణలోని అంశాలు 

శిక్షణలో ఈఆర్ఓ నెట్, గరుడ యాప్ వినియోగం, డోర్ టు డోర్ సర్వే విధానం, ఫారాల స్వీకరణ, విచారణ, అప్‌లోడింగ్ ప్రక్రియపై క్షుణ్ణంగా అవగాహన కల్పించారు. 01-01-2026 నాటికి 18 ఏళ్లు నిండే వారందరినీ ఓటరు జాబితాలో చేర్చడమే లక్ష్యమని అధికారులు తెలిపారు.

ఈ కార్యక్రమాల్లో తహసీల్దార్లు, ఎంపీడీవోలు, మున్సిపల్ కమిషనర్, సూపర్‌వైజర్లు, సుమారు 200 మంది బీఎల్ఓలు, వివిధ పార్టీల బీఎల్ఏలు పాల్గొన్నారు.